السلام عليكم عندى شاب شغال فى صيدليتى خريج اداب و بسم الله ما شاء الله دماغه ذرية ومتدين جدا واى حد بيشوفه او بيتعامل معاه بيهابه هو بقاله ٣ سنين معايا ومشوفتش منه غير كل خير الأذان يأذن يسيب الدنيا كلها ويجرى ع المسجد وده كان اتفاقه معايا اول ما جه وكان شرطه الأساسى وطبعا معروف بيبقى فيه فئة من النساء بيبقوا زباين للصيدلية ومتعودين عليها بيتعاملوا بطريقة مش تمام والناس الى عندها صيدليات عارفة الكلام ده تخيلوا ده الوحيد الى خلاهم يدخلوا الصيدلية زى الألف😀 وأجبرهم يحترموه لأنه صارم جدا فى التعامل معاهم مبيسمحش بأى مساحة للضحك أو الهزار الشاب ده عنده ٣٢ سنة ووالده توفى من ٨ سنين وترك له اخت واخ قاصر وورث من والده كام قيراط باعهم واستغل نصيبه فى جهاز اخته لأن طبعا هو صاحب النصيب الأكبر ونصيب الأخ القاصر اتحجز وقتها وحاليا بيشتغل علشان يقدر يوفر مصاريف علاج والدته المريضة وكمان بيساعد اخوه الأصغر منه فى زواجه ولما سألته طيب ده ليه ما كنت تشوف نفسك انت الأول واخوك ينتظر بما انه صغير لسه وانت سنك بيكبر قالى لا أنا عايز ألمه لأنه طايش شوية وممكن يغلط وكده كده مش هينفع أسيب امى لوحدها وقالى كلمة بترن فى ودانى لحد دلوقت الكبير مش كبير ببلاش فأنا متهيقلى مبقاش فيه حد متمسك بدينه و بالرجولة والجدعنة دى فى الزمن المهبب ده وأنا عندى بنت وحيدة خريجة طب بيطرى حابب أكون مطمن عليها وأعتقد مش هلاقى أفضل منه عايز أجوزهاله وأنا هساعده وهخليه يدير الصيدلية مقابل نسبة وعرضت على بنتى الفكرة ووافقت وقالتلى إنها لما كانت بتيجى الصيدلية مكنش بيرفع عينه فيها وبيتعامل بكل أدب وذوق المشكلة بقى إنى مش عارف أعرض عليه الموضوع ازاى بدون ما يحس بحرج لأنه عزيز النفس جدا ولو وصله احساس خاطئ هيمشى وهيسيب الشغل فورا بلا تردد وفى نفس الوقت برضه مش عايزه يحس انى بقلل من بنتى أتمنى تكونوا فهمتونى فأفتونى فى أمرى ماذا أفعل؟