انا مطلقة في العشرينات .. كنت مخطوبة لجوزي لمدة 3 سنين و بعد كده اتطلقنا .. كان ما بينا مشاكل زوجية كتير هو كان عنده سرعة في القذف ما بيقعدش اكتر من دقيقة و ما يهموش غير الايلاج و بس .. حاولت معاه كتير بالراحة و كلمته كتير بصراحة بس هو ماكنش عايز يلاقي حل و شايف نفسه تمام جدا رغم انه عارف اني بشر و مش باقدر اعيش من غير ده .. المهم اتطلقنا و اهلي ما يعرفوش المشكلة الجنسية اللي كانت بنا عشان استحيت .. هو كمان كان بياخد فلوسي كتير و بيضربني حتى في الشارع و ده اللي هم عارفينه .. اتطلقنا بعد ست شهور من الزواج من غير اطفال و حتى اضطريت ادفعله فلوس عشان يطلقني بسرعة من غير محاكم و لا تعطيل وقت و بريته من كل شئ .. مشكلتي ان بعد طلاقي بفترة كان معايا زميل في الشغل و قالي بصراحة انه عايز نتجوز .. هو متجوز و عنده اطفال بيموت فيهم .. فاتفقنا نستنى فترة لحد ما نعرف ازاي حنتجوز .. انا عرضت عليه حل اننا نتجوز سري و انا موافقة لاني باحبه قوي بس هو خايف مراته تعرف و تاخد حضانة الولاد و رافض فكرة الجواز العرفي عشان خايف عليا.. المشكلة دلوقتي ان عدت سنة كاملة و مفيش اي خطوة جديدة خدناها و الازمة اني انا محتاجة يكون معايا راجل اتجوزه و اعيش معاه .. خصوصا و ملحقتش اقعد وقت سعيد مع جوزي الاول .. من رابع شهر و احنا في خناق متواصل .. انا ما بين اني استنى الشخص اللي انا باحبه دلوقتي ده و استنى لحد ما ظروفه تتحسن و اشغل نفسي في شغلي و مع أهلي أو اني اسيبه و ارتبط بأول فرصة تجيني خصوصا اني مطلقة و الفرص مش بتيجي كتير .. أنا حاسة مؤخرا اني ماعنديش حياة .. و بقالي فترة باصب النقم كله على جوزي الاول .. انا مش قادرة اسيب الشخص اللي باحبه تماما كل مدى باتعلق بيه اكتر المشكلة انه عامل الوقت مش هاجس عنده علشان هو متجوز و انا على طول باقوله اني حاستناه و فعلا مش متخيلة اني اسيبه بس خايفة اندم بعدين خاصة ان طليقي بيحاول يرجعني و فيه كذا حد بس صالونات .. انا حاسة انه جد و صادق في كلامه و في نفس الوقت كل ما باضغط عالجواز بيقولي انتي مش مقدرة ظروفي .. انا متقبلة ظروفه جدا و مستعدة لجواز حتى لو سري بس يكون فيه خطوة لاني فعلا محتاجة اصون نفسي ..