السلام عليكم ورحمة الله وبركاته محتاج اتكلم معاكم واعرف لو حد فيكم مكاني كان ممكن يتصرف ازاي ؟ لاني مبقتش قادر افكر بجد من الخوف واليأس اللي وصلت ليه هحاول اتكلم باختصار مع ان الموضوع طويل جداا وتفاصيله متعبة نفسيآ جداا بدأ الموضوع من ٢٠١٦ كنت شاب في كلية هندسة وللأسف مكانش ليا نصيب اكمل فيها خرجت من ٣ سنة لظروف بعيدة جداا عن الفشل وبعد ماسبت الكلية اتعرفت علي بنت اللي هيا مراتي دلوقت انا من المنصورة وهيا من القاهرة كانت وقتها ١٩ سنه اتقابلنا مرة واحدة من وقت مااتعرفنا هيا والدها متوفي وليها ٣ اخوات بنات منهم واحدة متجوزة وبعد فترة بسيطة اتقدم ليها اكتر من حد وكانت بترفض وانا كنت معرفها من البداية ظروفي واني سايب الكلية وحياتي متلغبطة ومش وقت مناسب خاالص اني اتقدم ليها مامتهاعرفت اننا بنتكلم عملت معاها مشكلة كبيرة وحاولت اكلم مامتها واتفاهم معاها بس للاسف كانت رفضاني تماماا وده بسبب لاني من بلد تانية و أرياف وثانياا للظروف اللي كنت فيها كلمتني تاني بعد اللي حصل ده ومامتها عرفت بس كان تصرفها المرة دي مش طبيعي ضرب وتعذيب وحبس في أوضه ولا اكل ولا شرب سابت البيت من اللي حصل لها منهم و اول ماعرفت كلمت اختها الكبيرة في نفس الوقت و رجعتها وللأسف حصلها اكتر من الاول من ضرب وتعذيب رهيب وقص شعرها تمام وحبسوها ف الاوضه ولا اكل ولا شرب مكنش حته فيها سليمة واللي حصل ده للأسف دمرها نفسيآ تماما سابت البيت تاني ونطت من الدور ٢ من اللي حصلها ومقالتليش هيا فين خافت مني ارجعها تاني للبيت كلمت اختها اعرفعا لانهم مكانوش ف البيت وقتها اصلا وكان رد فعلها هيا ومامتها ف منتهي البرود واللامبالاة باللي حصل اصلا عدي اكتر من ١٠ ايام وكل اللي اعرفه انها عند حد من صحابها ورافضة ترجع نهائي من اللي عملوه فيها هيا ماسابتش البيت عشاني اني عمري ماشجعتها علي ده بالعكس انا اللي رجعتها بنفسي لاختها قبل كده بعد كده لقيت اختها بتكلمني تقولي شرط مامتها الوحيد عشان ترجعها البيت اني اجي اتقدم ونكتب كتابنا وتفضل عندها كأننا مخطوبين لحد مارتب حياتي كنت مصدوم ومستغرب من الكلام طبعا اتكلمت مع والدتي لأن والدي متوفي وانا الكبير وكانت علي علم بالموضوع انا كنت بقولها رفضت طبعاا اللي بيحصل منهم ده وبعد كلام كتير ومحاولات قدرت اقنعها واتفقنا محدش من اهلي ف البلد هيعرف كتب الكتاب ده عشان احنا ف أرياف ومحدش يفهم غلط قولنا اني هخطب ع الديق وخلاص اتنين من اخوالي بس اللي عارفين لانهم اتقدموا معايا لخالها واتفقوا معاه وكل ده ومامتها رافضة تقابلنا وكانت مقابلة خالها لأهلي ووالدتي ف منتهي قلة الذوق قابلنا ف الشارع واتفقنا علي اليوم وشرطت مامتها تاني اني هكتب قايمة كمان رفضوا اهلي طبعاا حاولت اقنعهم بصعوبة واني موافق ومتحمل كل حاجة ويشهد الله اني وافقت ورضيت بكل ده خوفا عليها وأنها تبقي ف الشارع بسببي بعد الحالة النفسية اللي وصلتها فكرة رجوعها البيت كانت مستحيلة بالنسبة ليها اللي حصل منهم كان صعب جداا عليها وهي مش وش بهدلة خالص من اطيب وانقي الناس اللي ممكن تقابلوهم كتبنا كتابنا ف ٢٠١٧ ومضيت علي القايمة وكان خالها اللي موجود هو وأختها الكبيرة بس ورجعت مع اختها علي بيتها ونزلت تاني يوم تجيب حاجتها من عند صاحبتها وترجع لمامتها عادي اختها كلمتها بتقولها ماما بتقولك ماترجعيش البيت وخليكي زي ما كنتي ومن غير اي أسباب بمعني اصح رموها ف الشارع ليا حاولت اكلم مامتها ماتردش ورافضه الكلام تمام معايا اكلم اختها تقولي مليش علاقة وده قرار مامتها ولو مش عاوزها سيبها حتي خالها اللي قعد معانا نفس الكلام برضه وخلاص بقت ف الشارع مفيش حد حتي من قرايبها تروح ليه حتي صاحبتها لو استحملتها اسبوع مش هتستحمل اكتر خوفت بصراحة اعرف والدتي باللي حصل الموضوع هيكبر اكتر وهتبقي هيا الضحية في وسط كل ده وفضلت محافظ عليا و معاها للاخر مكنش قدامي غير اني نزلت القاهرة وفهمت والدتي اني بشتغل هناك وكان معايا مبلغ بسيط وقتها اخدت شقة ايجار وفرش بسيط جداا مستعمل وخلاص بقت امانه ف رقبتي وقعدت معاها واشتغلت طبعاا وكل ده علي امل ان اللي حصل عادي ومشكلة وهتتحل ان شاء الله مفيش حد من أهلها غير وكلمته واحاول نتفاهم والرد ف الاخر انه ملوش علاقة وعلي الحال ده اكتر من سنه ونص في مرمطة وشغل عشان نعرف نعيش انا كنت لوحدي محدش من عندي يعرف اي حاجة باللي بيحصل وحالتها النفسية كانت وحشة جدااا من اللي حصلها وعشنا فترة صعبة جداا محدش سال عليها خالص ومفيش اي تواصل بين أهلها واهلي من بعد كتب الكتاب وكنت بنزل كل فترة عند والدتي وهي فاهمة اني شغال ف القاهرة ومتعرفش حاجة عن اللي بيحصل ولو سالت بتوه وافهمها ان الامور تمام واختفي أهلها تماما من حياتنا وفقدت الامل في كل المحاولات ومحدش فيهم اهتم اصلا وكان صعب جداا نكمل بالوضع ده اضطريت اعرف والدتي باللي حصل قلبت عليا واني ازاي اتصرف كده وهي شايفة اننا عملنا اللي علينا بالاصول وزيادة وهما اللي رموها وحصل مشكله كبيرة بينا وقالت ملهاش علاقة واني اتحمل نتيجة قراري وبصعوبة حاولت اقنعها تبقي معايا بس واكون متجوز قدام اهلي وعايش ف القاهرة ورفضت والدتي الكلام او التعامل مع مراتي بسبب أهلها واللي عملوه معايا وعشنا مع بعض علي نفس الوضع اللي كنا فيه وحاولت كتير اصلح العلاقة بين والدتي ومراتي محصلش ومرت علينا سنين علي نفس الحال كنا لوحدنا حرفيا محدش بيسال فينا ولا أهلها ولا اهلي اتمرمط ف الشغل ومعرفتش اجيب حاجة جديدة حتي ف البيت وربنا رزقنا ببنوتة اغلي حاجة ف حياتنا والدنيا اتحسنت شوية والحمد لله حاولت اعمل مشروع مرتين وللأسف ماتوفقتش فيهم ورجعت اشتغل بره تاني وحصل حمل تاني بدون اي ترتيب كانت إرادة ربنا وزادت المسؤلية والضغط من مصاريف ايجار لمصاريف معيشة وزادت مصاريف الحمل التاني كمان والموضوع بقي صعب جداا وكل فترة كنت بحاول اصلح العلاقة مع والدتي برضو وفضلت رافضة بالنسبة ليها بيتها مفتوح في اي وقت بس ملهاش علاقة بينا خالص وعدت شهور الحمل بسرعة مقدرناش نجمع اي فلوس للولادة وللأسف اضطرينا نبيع العفش مكنش في حل تاني وكنا راضيين والحمد لله عدت علي خير وربنا رزقنا بولد زي القمر ونزلت شغل تاني بعد الولادة بأسبوع كنت معاها ف البيت ومفيش حد معانا تمام بعد ربنا اشتغلت باليوم ب ١٣٠ جنيه بعد المواصلات ومع وجود طفلين الموضوع بقي صعب حتي الايجار اتراكم علينا بالشهرين وعلي الحال ده من ٤ شهور من سئ للأسوأ حاسس والله اني في حلم وهيخلص صعبان عليا حالي اوي واللي وصلت ليه وايه السبب ف كل ده ؟؟ ده انا عملت اللي يرضي ربنا وفضلت محافظ عليها وراضي بكل حاجة وبحمد ربنا علي كل حال احساس صعب اوي وانا شايف حياتي بتنهار وولادي معانا ملهمش اي ذنب يعيشوا كل ده ٧ سنين من الوحدة حرفيا كفاية يخلصوا كل طاقتي انا والله مش محتاج حاجة من حد غير دعوة صادقة لعلها تكون مجابة دعوة بالفرج وصلاح الحال انا ف أمس الحاجة للدعوة دي شاكر جداا ليه واسف جداا للإطالة