أنا بنت عمري ٤٢ سنة مش متزوجة و معظم يلي بيجوني مطلقين او ارامل و عندهم اولاد ، بس ما بيتم النصيب لكني صراحة أنا خايفة من فكرة الرجال المطلقين لإني ما بعرف شو سبب طلاقهم ، مع إنهم كل المطلقين بيعملوا حالهم مظلومين من زوجاتهم و إشي بيقول خانتني و إشي بيقول مجنونة و مش طبيعية ... لكني بخاف يكونن هن المظلومات و هن المخيونات منهم أو إنه هم نفسهم يلي يكونوا مش طبيعيين و متحكمين و ذالينها أو غاصبينها تخدم أمهم و ابوهم متلاً و هالشي وارد و ما إلهم حق يطلقوها عهيك سبب ؛ لإنه الزلمة هو المجبور يخدم امه و ابوه هو و أخته مش زوجته ، و شفت حالات متل هيك رجال ظالمين زوجاتهم ، بس بيحطوها بروس طليقاتهم إنهن هن الغلطانات بحقهم ؛ لحتى يقدروا يلاقوا مين ترضى فيهم و بعيوبهم . والله يا بنات صعب أوصل لطليقاتهم و أسألهن لإنه برضو مش رح أحصل عالصافي و انا بعرف إنه مش شرط يكونوا المطلقين سيئين و نفس الشي زوجاتهم كمان ممكن يكونن مش سيئات ، يعني ممكن يكون سبب الطلاق هو اختلاف الطباع يعني الاتنين يكونوا كويسين مش شرط واحد منهم ظالم و التاني مظلوم رغم إنه ما في مرأة بهالمجتمع الذكوري بتظلم زلمة بس برضو معرفة سبب الطلاق ممكن يكون مفتاح لأشياء كتير مخفية صح ولا لأ ؟ مستحيل اوافق على شخص خاين مرته او ضاربها أو هاينها أو ظالمها فلهيك ضروري جداً أعرف سبب الطلاق . و اذا بدكن تحكنلي صار عمرك ٤٢ سنة و لازم تنستري و توافقي عحيالله 😲 متل ما بعض الغجر بقولولي حاشاكم ، فبحب احكيلكن إنه الاستقرار النفسي كمان مطلوب مش بس العاطفي أو بلاش من الزواج كله ، و مش مهم يكون في زلمة بحياتي لحتى انبسط ؛ صحيح إني إنسانة و بحب االاستقرار العاطفي بس الحمد لله واعية و بعرف إنه الاستقرار النفسي و راحة البال مطلوبة ؛ لإني الحمد لله بعزوبيتي مبسوطة بحياتي و خواتي المتزوجات بسمع منهن ماكلات هوا مع أزواجهن ، يعني وارد جداً إنه ممكن الزلمة يجيبلي التعاسة بالحياة اذا ما كان مناسب لإلي من البداية ،فإذا كان كويس و مناسب فأهلا و سهلا بس إذا كان لئيم او ظالم او عصبي او كذا فيا مرحبا بالعنوسة بهايي الساعة اشرفلي من ١٠٠ زوج مش مناسب ، و اذا فيكن وحدة بدها تحكيلي ابوك و امك مش دايمينلك فبحكيلك ليش هو يعني الزوج دايم ؟ ليش بلله الإبن دايم ؟ ما حدا دايم لحدا غير رب العزة و تفاقيد ألله رحمة ، بتحسسونا بإنّا رح نعيش مخلدين للأبد لو تزوجنا ، مهو كل الناس يلي قبلنا ماتوا ، أجداد امهاتنا و آبائنا و اخوانهم كلهم ماتوا بالنهاية سواء تزوجوا او تطلقوا أو عنسوا أو ترملوا او تسخموا كلهم ماتوا بدون استثناء ، يلي عنده ولد و يلي ما عنده ولد آخرته يموت ، و ما بنعرف شو هي طريقة ميتتنا بالنهاية فليش بعض الناس خاصة كبار السن بيفرجونا بإنه الزواج بيطول العمر و إنه الأعزب مصيره يموت بالنهاية؟ حسبي الله بكل متخلف و بكل وحدة بتحاسبني ليش بعدني مش متزوجة بتفكر حالها بنصيحتها إني رح اقبلها ، بالعكس هيك بتخليني اكره الزواج بزيادة و أكره المجتمع بسبب نصيحتها لإنه بيكون قصدها وافقي على حيالله واحد او بتموتي ... المهم بلاش انا ابعد عن الموضوع الاساسي ، الشغلة يلي بدي استشيركم فيها هي إنه : عندي طريقة لحتى اعرف سبب طلاقه و اشوف هل هو بناسبني هيك او لأ ، و حابة اشاوركم فيها و يا ريت تدلوني للصح ؛ لإني انا شخصياً مقتنعة فيها هالطريقة بس بدي اشوف ردود افعالكن عليها هل هي بتناسبكن انتن او لأ . كونه هسا في عريس تقدملي عمره ٤٥ سنة و مطلق و معه ولدين و متل عادتهم بيعملوا حالهم مظلومين . الطريقة هي إني أسأله عن سبب طلاقه و احكيله معلش بس في مجال لو هسا جبتلك المصحف إنك تحلف عليه ؟ منشان نكون على بينة من البداية ؟ بحكم إنا ما بنعرف بعض احنا وياكم ، و بتمنى إنك تقدر هالشي ، رغم إنكم ممكن تكونوا أحسن منا بس رح احكيله بإني انا هيك دايماً لما يتقدملي عريس مطلق بحب اسمع منه قصة طلاقه و يحلفلي بإنه صادق و رح احكيله يا ريت ما تزعل مني و تتقبل الموضوع برحابة صدر و تحط حالك مكاني ... هيك رح احكيله بالحرف الواحد لإني فعلاً بدي اعرف الصافي و انا متأكدة إنهن رح ييجن عضوات يحكنلي يلي بيظلم ما بتفرق معه و مستعد يحلف كذب ، طيب ماشي ما اختلفنا ، بس برضو هو شو خسران لما يقسم عالمصحف ما دام عارف نفسه صادق ؟ و انا عالاقلية بكون عملت يلي عليي ، يعني الحلف بموضوع متل هيك افضل بكتير من السماع بدون حلف .. قدرن شعوري يا بنات و هالشي لازم ينتشر عند كل الناس إنه يلي بده يتقدملها مطلق فالأفضل يحكي سبب طلاقه و يحلف عالمصحف بإنه فعلاً مظلوم او عالأقلية يكون صادق بسرد القصة و يحسب حساب بإنه بده يحلف على كتاب الله . ترى الموضوع مستحق الحلفان طبعاً ، و هايي شراكة بالحياة المؤبدة يعني ممكن تكون الحياة الزوجية معهم عبارة عن سجن صح ولا لأ؟ يا بنات ما بدي استهين بنفسي و يلي بدها تحكيلي هسا بتطيريه فعادي خليه يروح يبحث عن غيري مش مضطرة اتزوج واحد غلط او ظالم و عادي يا مرحبا بالعنوسة أشرفلي من إني اتزوج هيك شخص . و بنصح كل بنت لو تقدملها مطلق إنها تعمل متلي ؛ لإنها الشغلة مش سايبة و هذا زواج مش حيالله ، فلو إنه ما رضي يقسم عالمصحف أو صار يتفلسف و يحكيلي معناها مش واثقة بكلامي معناها بكون جد مش ثقة و كذاب ، و بكون هو الغلطان بحق طليقته و بتكون هي يلي طلقته مش هو متل ما دايماً بقولوا . لو واثق من نفسه فعادي بينبسط مني و بيحلف و هو واثق من نفسه . بعرف إنه هون معنا بالجروب أكيد في أمهات أو خوات مطلقين ، بس برضو كلامي صحيح ما فيه غلط ، و لو عنجد إبنك او اخوك المطلق مظلوم فبإمكانه هو بنفسه يحكي قصة طلاقه و يمسك المصحف و يحلف عليه إنه مظلوم من طليقته او يحلف بإنه صادق بكل كلمة بيحكيلها . ما حدا بيحكي عن زيته عكر و لو العريس راح و ما رجع من بعد طلبي هذا فهيك انا رح اعرف بإنه مش خير لإلي لإني بكون عملت يلي عليي و عرفت إنه هو الغلطان و هو الظالم و لو كان فعلاً بريء كان بكل ثقة حلف عالمصحف و تقبل هالشي بروح رياضية بدل ما يصير يتأفأف . و بعتذر عالإطالة